Walang palya sa pagiging Twitter trending topic every night ang Nandito Ako mula nang magbukas ang mini-seryeng ito ng TV5 noong isang linggo. Nakamamanghang hindi lang sa Pilipinas nagtre-trend ang Nandito Ako kundi sa iba't-ibang parte ng mundo. Bukod sa Pilipinas, trending ito worldwide at pati na din sa mga bansang tulad ng Malaysia, Vietnam at sa iba't-ibang states sa Amerika.

Dala nga ito ng kasikatan ng American Idol singing sensation na si David Archuleta na bida sa mini-serye, katambal ang homegrown primetime princesses ng TV5 na sina Jasmine Curtis Smith at Eula Caballero. Pero ayon na din sa mga tweets ng mga sumusubaybay sa Nandito Ako, hooked na sila sa magandang kuwento ng mini-serye at puring-puri nila ang acting ng cast pati na din ang magagandang eksena na sumailalim sa masusing direksyon ni direk Mac Alejandre.

Marami din ang nakaka-relate sa pinagdadaanan ng tatlong ina ng mga bida. Ang ina ni Anya (Jasmine Curtis Smith) na si Theresa (Gelli de Belen) ay handang gawin ang lahat para sa mga anak. May mga pagkakataon man na nasasaktan niya ang anak, hindi matatawaran ang laki ng isinakripisyo niya sa buhay. Isa siyang hospitality girl na ibinenta maging ang kaniyang dignidad maitaguyod lamang ang mga anak na mag-isa niyang pinalaki.

Ang ina naman ni Holly (Eula Caballero) na si Margaret (Aiko Melendez) ay mistulang sagabal sa kaligayahan ng kaniyang anak. Pero sa likod ng kaniyang paghihigpit ay ang matinding pagmamahal nya sa anak at ang kaniyang lihim na takot na mawala ito sa kaniyang buhay.

Si Cara (Giselle Toengi) naman ang dahilan kung bakit nasa bansa ang sikat na international singer na si Josh Bradley (David Archuleta). Dahil sa isang sunog sa hotel kung saan nawalay siya sa kaniyang anak, namuhay si Cara sa malagim na alaala ng trahedya. Sa pagpunta sa bansa ni Josh, sa kabila ng kaniyang kasikatan, hangad niyang buuin ang kaniyang pagkatao at hanapin ang kaniyang ina.

Subaybayan ang madamdaming kuwentong ito ng tatlong inang may kani-kaniyang hinagpis sa buhay at ang kanilang tatlong anak na hangad na mas makilala ang kanilang mga sarili. Sila ang mga karakter na minamahal ng libo-libong manonood mula sa iba't-ibang sulok ng mundo na nakaabang sa bawat eksena ng Nandito Ako gabi-gabi.

Mapapanood ang Nandito Ako mula Lunes hanggang Biyernes ng gabi pagkatapos ng Wil Time Bigtime sa TV5.