Dalawang dekada na ang nakalipas nang magsimula ang isang teleseryeng sinubaybayan at minahal sa loob ng limang taon. Sa panahong ito, dalawang istasyon ang naging tahanan ng dalawang karakter na nagtuos sa tulak ng poot, galit at paghihiganti. Ngayong 2012, nagbabalik ang mga dakilang karakter ng Valiente sa kanilang bagong istasyon, ang TV5.

Balikan natin ang makasaysayang istorya ng dalawang pamilya na haharap sa hamon ng buhay at magtutunggali upang makamit ang pagmamahal at katotohanan. Ang malalim na pagkakaibigan nina Theo Braganza at Gardo Valiente, ang malaking hamon na kanilang haharapin bunga ng kasakiman ni Donya Trining, at ang hadlang sa pag-iibigan ni Gardo at Maila Braganza. Abangan rin ang lihim na mabubunyag sa pagkatao ni Gardo at ang kanyang magiging armas laban sa mga Braganza.

Ang klasik na obra ay ibinabalik sa moderno nitong pagsasalaysay na pagbibidahan nina JC de Vera, Oyo Boy Sotto, Nadine Samonte at Nina Jose kasama sina Cherry Pie Picache, John Regala, Jaclyn Jose, Michael de Mesa at Mark Gil. Para sa bagong henerasyon, panoorin ang bagong Valiente.