Simula Lunes, Pebrero 27, magsisimula na ang dalawang back to back soap opera ng TV5, isa rito ang makabagbag-damdaming istorya ng "Isang Dakot na Luha."

Ang "Isang Dakot na Luha" ay istorya ng isang ina, na sa kanyang pagsusumikap na mapanatiling buo ang kanyang pamilya, ay haharapin ang mga sunod-sunod na pagsubok.

Makakasama ng Kapatid Star na si Alex Dixson ang kanyang co-star sa Babaeng Hampaslupa na si Jay Manalo sa bagong afternoon drama. Gagampanan nila ang papel ng mag-asawang Amelia at Mario na susubukin ng tadhana ang kanilang pagmamahalan sa kanilang paghihiwalay at pagkakawalay ng kanilang tatlong anak.

Lumaki sa bahay ampunan at walang kinalakhang magulang, ipinangako ni Amelia na magiging mabuti siyang ina at hindi iiwan ang kanyang mga anak. Ngunit ang kanyang kinakatakutan ay magaganap.

Ang magpapahirap sa buhay ni Amelia ay si Veronica (Glydel Mercado), na hindi lamang kukunin ang kanyang asawang si Mario kundi ipapatapon pa si Amelia sa malayong lugar. Magdudulot din si Veronica ng matinding pagpapahirap sa buhay ng tatlo nilang anak. Paghihiwalayin ni Veronica ang magkakapatid ang sisiguraduhing lalaki ang mga ito na may galit sa ina.

Gaganap bilang mga kaawa-awang anak nila Amelia at Mario ang TV princess na si Danita Paner bilang panganay na si Angela. Ang mapait na karanasan nito ay magpapatindi sa galit na itatanim niya laban sa kanyang ina. Kukupkupin naman ni Veronica si Almira (Lianne Valentin) at gagamitin laban kay Amelia. Ang bunsong anak na si Abigail (Junyka Santarin) ay mahihiwalay din sa kaniyang kapatid dahil ipaampon ito sa iba.

Bubuo sa cast ng Isang Dakot na Luha sina Edgar Allan Guzman, Karel Marquez, Jenny Miller, Elvis Gutierrez at Daria Ramirez.

Sa direksiyon ni Eric Quizon, siguradong magpapaiyak tuwing hapon ang Isang Dakot na Luha na ka-back to back ng Felina at parehong magbubukas ng afternoon drama block ng TV5 ngayong Lunes, February 27.